देशकै दोस्रो राष्ट्रपति बनेकी एमालेकी तत्कालीन उपाध्यक्ष विद्यादेवि भण्डारीले दुई कार्यकाल राष्ट्रपति बनेर बिताइन् । आफ्नो कार्यकाल सकिएपछि उनी पनि पुनः पार्टी राजनीतिमा आउने चर्चा चलिरहेको छ । विगतमा एमाले अध्यक्ष केपी शर्मा ओलीकै आशीर्वादले राष्ट्रपति बनेकी उनी अहिले हालका प्रधानमन्त्रीसमेत रहेका ओलीविरुद्ध भाषण गर्न थालिसकेकी छन् । यसको अर्थ आगामी पार्टीको महाधिवेशनमा उनी अध्यक्ष पदमा उठ्ने संकेतका रुपमा लिइएको छ ।

एमाले अध्यक्ष ओलीसित राम्रो सम्बन्ध बनाउन नसकेका र ओलीले राजनीतिमा अवसर नदिएर पाखा पार्न खोजिएका धेरै एमाले नेता तथा कार्यकता अहिले विद्यादेविसित निकट भइरहेको बुझिन्छ । स्रोतहरुका अनुसार पार्टीका काममा वा व्यक्तिगत काम लिएर राजधानी आउने एमालेजन पार्टी कार्यालय ललितपुरको च्यासल पुगेर एमाले नेताहरुसित भेट गरेपछि पूर्व राष्ट्रपति भण्डारीलाई भेट्न बुढानिलकण्ठ पुग्ने गरेका छन् ।

भण्डारीलाई महासचिव शंकर पोख्रेल, केपी ओलीका राजनीतिक सल्लाहकार विष्णु रिमाल, डा राजन भट्टराईदेखि केही व्यक्तिवाहेक धेरैले आगामी अध्यक्ष बन्न हौस्याउने गरेको जानकारहरुको बुझाइ छ ।

जे होस्, देशको प्रमुख कार्यकारी पदमा पुगेका व्यक्ति पुनः राजनीतिमा फकँदा यसको कस्तो संदेश जान्छ ? यो विषय अहिले सतहमा आएको छ । हुनत रुसका राष्ट्रपति भ्लादिमिर पुटिन राष्ट्रपति बनेपछि प्रधानमन्त्री पनि बनेको र त्यसपछि फेरि राष्ट्रपति बनेको इतिहास जगजाहेरै छ । पद र शक्तिका लागि जे पनि गर्न चाहने राजनीतिक प्राणीहरुले अवसर नपाएको अवस्थामा आफ्नो हैसियत बिर्सिएर तलसम्म झरेका धेरै उदाहरण छन् । नेपालमा पनि त्यसको सुरुवात नन्दकिशोर पुनले गरिसकेकोले विद्यादेवि भण्डारी पनि एमाले अध्यक्ष हुँदै प्रधानमन्त्री नबन्लिन भन्न सकिन्न ।