नेपाली सांगीतिक क्षेत्रमा उदाउँदै गरेकी प्रतिभाशाली कलाकार पारितोषिका पन्तले ‘पहिलो हाँसो, पहिलो बोली’ गीतको म्युजिक भिडियोमार्फत फेरि एकपटक दर्शकमाझ आफ्नो प्रभावशाली उपस्थिति जनाएकी छन्। लोकप्रिय गायिका अञ्जु पन्तकी छोरी पारितोषिका पछिल्लो समय निरन्तर अभिनय क्षेत्रमा सक्रिय छन्।

पारितोषिकाले यसअघि करिब आधा दर्जन नेपाली म्युजिक भिडियोमा अभिनय गरिसकेकी छन् । यस कारण पनि पहिलो हाँसो, पहिलो बोलीमा उनको अभिनय झन् परिपक्व, स्वाभाविक र आत्मविश्वासपूर्ण देखिएको छ। भिडियोमा उनको एक्सप्रेसन, क्यामेरा फेसिङ र भाव प्रस्तुतिले दर्शकको ध्यान आकर्षित गरिरहेको पाइन्छ ।

यो गीत रोमान्टिक भावमा आधारित छ, जसमा आधुनिक मेलोडी र समकालीन संगीत संयोजन गरिएको छ। युवापुस्तालाई लक्षित गरेर तयार पारिएको भिडियोमा आकर्षक छायाङ्कन, सन्तुलित कलर टोन र दृश्य संयोजन देख्न सकिन्छ। निर्देशन पक्षले पनि सरल तर प्रभावकारी कथावस्तु प्रस्तुत गर्न सफल देखिन्छ। भिडियोमा पारितोषिकासँगै जीबी चिरन, दिया जीसी र साजन कार्कीको अभिनय रहेको छ।

विशेष रूपमा, पारितोषिकाले गत वर्ष मण्डला थियटरबाट औपचारिक रूपमा नाटक अभिनय प्रशिक्षण सम्पन्न गरेकी हुन्। यसले उनको अभिनय यात्रामा थप गहिराइ र व्यावसायिकता ल्याएको देखिन्छ। म्युजिक भिडियोमा देखिएको उनको अभिव्यक्ति र प्रस्तुतिमा थिएटर पृष्ठभूमिको प्रभाव झल्किन्छ। सेलिब्रेटी परिवारको पृष्ठभूमि हुँदाहुँदै पनि पारितोषिका आफ्नै मेहनत, सीप र निरन्तरतामार्फत कलाकारितामा स्थापित हुने बाटोमा अग्रसर देखिन्छिन्। सामाजिक सञ्जालमा पनि उनको प्रस्तुति, लुक्स र अभिनय शैलीप्रति सकारात्मक प्रतिक्रिया बढ्दो छ।

आगामी दिनमा उनी अभिनय क्षेत्रमा अझ सशक्त रूपमा प्रस्तुत हुने बताउँछिन् । संगीतसँग पारिवारिक सम्बन्धका कारण गायन क्षेत्रमा समेत सम्भावित उपस्थितिको चर्चा चलिरहेको छ । हालको प्रस्तुतिले उनलाई नयाँ पुस्ताकी सम्भावनाशील र प्रतिबद्ध कलाकारको रूपमा स्थापित गर्दै लगेको पाइन्छ।