सशस्त्र प्रहरी बल नेपालको नेतृत्व सम्हालेसँगै महानिरीक्षक नारायणदत्त पौडेलले सङ्गठनलाई व्यक्तिकेन्द्रित अभ्यासबाट नीतिनिष्ठ प्रणालीतर्फ रूपान्तरण गर्ने स्पष्ट सन्देश दिनु भएको छ । सोमबार गृह मन्त्रालयमा दर्ज्यानी चिह्न ग्रहण गरेलगत्तै उहाँले व्यावसायिकता, सुशासन र परिणाममुखी कार्यशैलीलाई प्राथमिकतामा राख्दै सुधारको ठोस मार्गचित्र अघि सार्नु भएको हो ।

पौडेलले सङ्गठनभित्र सरुवा, बढुवा र वृत्ति विकासमा देखिने अनौपचारिक ‘शक्ति केन्द्र’को प्रभाव अन्त्य गर्ने संकेत दिँदै ‘सङ्गठन व्यक्तिले होइन, नीतिले चल्नुपर्छ’ भन्ने मूल मन्त्रलाई आफ्नो कार्यकालको आधार बनाउने बताउनु भयो। उहाँको यस्तो प्रतिबद्धताले सशस्त्र प्रहरीभित्र दीर्घकालीन रूपमा अपेक्षित पारदर्शिता र उत्तरदायित्व स्थापित हुने विश्वास गरिएको छ।

सीमा सुरक्षालाई थप सुदृढ बनाउन रणनीतिक कार्ययोजना तयार भइसकेको जानकारी दिँदै त्यसको प्रभावकारी कार्यान्वयन तत्काल सुरु गरिने उहाँको भनाइ छ । आधुनिक प्रविधिको प्रयोग, सूचना प्रणालीको सुदृढीकरण र नतिजामुखी कार्यशैलीमार्फत सङ्गठनलाई समयसापेक्ष बनाउने उहाँको योजना छ।

सरकारले अघि सारेको ‘१०० बुँदे शासकीय सुधार योजना’लाई सशस्त्र प्रहरीभित्र कार्यान्वयन गर्ने विषयलाई पनि उहाँले उच्च प्राथमिकतामा राख्नु भएको छ । संविधान र कानुनअनुसार सङ्गठनको भूमिका थप स्पष्ट बनाउँदै संघीय ऐनहरूमा आवश्यक परिमार्जनमार्फत संस्थागत सुधार अघि बढाइने साथै, सबै दर्जाका कर्मचारीहरूको कल्याण, निष्पक्ष बढुवा प्रणाली र व्यावसायिक सुरक्षालाई सुनिश्चित गर्ने प्रतिबद्धता व्यक्त गरिएको छ।

विपद् व्यवस्थापनलाई समेत प्रमुख कार्यक्षेत्रका रूपमा राख्दै पौडेलले मनसुनजन्य जोखिमका बेला उद्धार, राहत र पुनर्स्थापनामा सशस्त्र प्रहरीलाई अझ प्रभावकारी रूपमा परिचालन गरिने बताउनु भयो।

सो अवसरमा गृहसचिव राजकुमार श्रेष्ठले सङ्गठनभित्र सरुवा र बढुवालाई ‘अनुमानयोग्य’ बनाउने दिशामा काम गर्न निर्देशन दिनु भएको छ । यसले लामो समयदेखि देखिएको असन्तुष्टि घटाउँदै संस्थागत स्थायित्वमा योगदान पुर्‍याउने अपेक्षा गरिएको छ। समग्रमा, आईजीपी पौडेलको नेतृत्वमा सशस्त्र प्रहरी बल नेपालले ‘व्यक्ति होइन, नीति’को सिद्धान्तलाई आत्मसात् गर्दै सुशासन, पारदर्शिता र आधुनिक व्यवस्थापनतर्फ अग्रसर हुने संकेत देखिएको छ।