नेपाली समाजमा महिला आत्मनिर्भरता र सीप विकासको कुरा गर्दा मकवानपुरकी अमृता श्रेष्ठ बलामी एउटा बलियो र प्रेरणादायी नामका रूपमा अगाडि आउनुहुन्छ। मकवानपुर जिल्लाको हटिया– ३, हाल हेटौडा– १७ मा बुवा नोखबहादुर श्रेष्ठ र आमा मैनाकुमारी  श्रेष्ठको कोखबाट २०४० को दशकमा जन्मिनु भएकी अमृताले आफ्नो लगनशीलता र निरन्तरको मिहिनेतका कारण आज आफूलाई एक सफल उद्यमी र प्रतिष्ठित प्रशिक्षकका रूपमा स्थापित गरिसक्नु भएको छ।

प्लस टु सम्मको औपचारिक अध्ययन पूरा गर्नुभएकी उहाँले आफ्नो रुचि र क्षमतालाई सीप र व्यवसायमा बदल्ने दृढ सङ्कल्पका साथ अगाडि बढ्नुभयो, जसको नतिजा स्वरूप आज उहाँ हजारौँ महिलाहरूको जीवन बदल्ने माध्यम बन्नुभएको छ।

अमृताले व्यावसायिक यात्राको सुरुवात विक्रम संवत् २०६९ सालबाट हेटौँडा– २, हरिकुञ्ज रोडमा अनुराग लेडिज टेलर्स एण्ड प्रशिक्षण केन्द्र स्थापना गरेर गर्नुभएको हो। १४ वर्षदेखि निरन्तर सञ्चालनमा रहेको यो केन्द्र आज हेटौँडा र आसपासका क्षेत्रका महिलाहरूका लागि सीप सिक्ने र उद्यमी बन्ने एउटा मुख्य थलो बनेको छ।

व्यवसाय सञ्चालनसँगै आफ्नो क्षमतालाई थप तिखार्न उहाँले प्राविधिक शिक्षा तथा व्यावसायिक तालिम परिषद् (सिटिइभिटी) बाट टेलरिङमा लेभल १, लेभल २ र लेभल ३ सम्मको उच्च तह सफलताका साथ उत्तीर्ण गर्नुभयो। फेसन डिजाइनमा लेभल वान एडभान्स कोर्स पूरा गर्नु भएकी उहाँले व्यवसाय र प्रशिक्षणलाई अझ वैज्ञानिक र स्तरीय बनाउनका लागि ट्रेनिङ अफ ट्रेनर्स, आरपिएल एसेसर, आरपिएल काउन्सिलर तथा उद्यमशीलता विकास जस्ता विभिन्न राष्ट्रिय स्तरका उच्च प्रविधियुक्त तालिमहरू समेत हासिल गर्नुभएको छ।

यो उच्च दक्षता र शैक्षिक योग्यताकै कारण अमृताले नेपालका विभिन्न सरकारी, गैरसरकारी तथा प्राविधिक शिक्षालयहरूमा मुख्य प्रशिक्षकका रूपमा काम गर्ने अवसर पाउनुभएको छ। उहाँले नेपाल भारत मैत्री बहुप्राविधिक शिक्षालय हेटौँडा, कालीगण्डकी बहुप्राविधिक शिक्षालय तनहुँ, सीप विकास तालिम केन्द्र हेटौँडा, व्यावसायिक प्रशिक्षण केन्द्र इटहरी र विभिन्न जिल्लाका सामाजिक विकास कार्यालयहरू मार्फत आफ्नो सीप देशैभरि फैलाउनुभएको छ। उहाँको प्रशिक्षण यात्रा मकवानपुरमा मात्र सीमित नभएर दोलखा, जिरी, जुम्ला, बारा, बकैया गाउँपालिका र भीमफेदी गाउँपालिकासम्म पुगिसकेको छ।

यी क्षेत्रहरूमा उहाँले लेभल १, लेभल २, फेसन डिजाइनका एडभान्स कोर्सहरू र लेभल ३ का जटिल कोर्सहरू पढाउँदै आउनुभएको छ। उहाँको हातबाट सीप सिकेर आज हजारौँ दिदीबहिनीहरू आफ्नै खुट्टामा उभिन सफल भएका छन्, जसले घरपरिवार सम्हाल्दै आफ्नो व्यवसाय सुरु गरेर आर्थिक रूपमा आत्मनिर्भर जीवन बिताइरहेका छन्। उहाँले सीप सिकाएका महिलाहरुको संख्या ५ हजारभन्दा बढी छ भने समग्रमा स्वरोजगार बनेका महिलाको संख्या लाख बढी पुगेको छ । उहाँले दक्ष बनाएका महिलाहरु गाउँगाउँ गएर थप तालिम दिँदै स्वरोजगार बनाउने अभियानमा जुटिरहेको पाइन्छ ।

आफ्नो व्यवसाय र प्रशिक्षण कार्यलाई कुशलतापूर्वक अगाडि बढाउँदै अमृताले विभिन्न सामाजिक र व्यावसायिक सङ्घसंस्थाहरूको नेतृत्वदायी भूमिका समेत सम्हालिरहनु भएको छ। उहाँ हाल नेपाल कपडा तथा सिलाई व्यवसायी सङ्घ मकवानपुरको जिल्ला अध्यक्ष, राष्ट्रिय महिला उद्यमी समितिको केन्द्रीय सदस्य तथा बागमती प्रदेश संयोजकका रूपमा सक्रिय हुनुहुन्छ।

यो जिम्मेवारी मार्फत उहाँले बागमती प्रदेशका धेरै जिल्लाहरूमा पुगेर स्थानीय दिदीबहिनीहरूसँग प्रत्यक्ष सहकार्य गर्दै उहाँहरूलाई सीप सिकाउने, आन्तरिक ऊर्जा जगाउने र नयाँ व्यवसाय सुरु गर्न सक्ने वातावरण निर्माण गरिरहनुभएको छ। एउटा सामान्य परिवारमा जन्मिएर, आफ्नो सीपलाई परिष्कृत गर्दै र हजारौँ महिलाहरूलाई उद्यमशीलताको बाटोमा डोर्‍याउँदै अगाडि बढिरहनुभएकी अमृता श्रेष्ठ बलामी आजको नेपाली समाजका लागि आत्मनिर्भरता र महिला सशक्तीकरणको एउटा उत्कृष्ट र उदाहरणीय प्रतिमूर्ति बन्नुभएको छ।