स्पार्कल इन्टरटेन्मेन्टले मिस्टर एण्ड मिस सिनियर तथा जुनियर आइडल सिजन–३ को औपचारिक घोषणा गरेको छ। प्रतियोगिता आगामी बैसाख ५ गतेबाट राजधानी काठमाडौंमा सुरु हुने आयोजकले जानकारी दिएको छ।

प्रतियोगिता बालबालिका र किशोर– किशोरीमा लुकेका प्रतिभा उजागर गर्ने, आत्मविश्वास र व्यक्तित्व विकासमा सहयोग पुर्‍याउने तथा कला प्रदर्शनको प्लेटफर्म उपलब्ध गराउने उद्देश्यले आयोजना गरिएको बताइएको छ।

सिजन–३ मा सहभागी बालबालिकाको उमेर समूहमा जुनियर ए (६–८ वर्ष), जुनियर बी (९–१२ वर्ष), सिनियर (१३–१५ वर्ष) रहेको छ। अभिभावकहरूले आफ्नो सन्तानको नाम बैसाख ५ गतेसम्म दर्ता गराउन सक्नेछन्। दर्तापछि एक महिनाको प्रशिक्षण हुने र जेठ २ गते राष्ट्रिय नाचघरमा ग्राण्ड फिनाले आयोजना गरिने स्पार्कल इन्टरटेन्मेन्टकी सीईओ नितु श्रेष्ठले बताउनु भयो।

पछिल्ला दुई सिजनका विजेताहरूले प्रतियोगिताको स्तर र उत्साह दुवै बढाएका थिए। पहिलो सिजनमा रियान्शु दाहाल, पूर्णिमा थापा, श्रृष्टि बम्जन र अनमोल उप्रेती विजेता बनेका थिए। दोस्रो सिजनमा कृषा हुमागाँई, स्वीकृति पुन र प्रभाव राई विजेता थिए।

शनिबार (आज) भएको पत्रकार सम्मेलनमा स्पार्कल इन्टरटेन्मेन्टकी सीईओ श्रेष्ठले अभिभावकहरूलाई समयमै नाम दर्ता गर्न आग्रह गर्नु भयो। वरिष्ठ कोरियोग्राफर रोजिन शाक्य, सामाजिक अभियन्ता पूण्य गौतम र मिना ढकालले प्रतियोगिताको सफलताको शुभकामना व्यक्त गर्नु भयो।

सिजन–३ आगामी पुस्ताको प्रतिभा उजागर गर्दै प्रतिभाशाली बालबालिकालाई आफ्नो कला प्रदर्शन गर्ने रचनात्मक मञ्च उपलब्ध गराउने अपेक्षासहित आयोजना गरिएको आयोजकको भनाइ छ।